صباح الورد أو مساهـأحد منكم جرب يوقف عند آخر مرحله مهمه مر فيها بحياته ..
وحب يسترجعها بكل تفاصيلها ..
يصير ودك تعيد على نفسك كل الاحداث ..
من متعتها وصعوبتها وغرابتها .. وحتى الطفش والروتين اللي فيها
من اول ما صارت لحد آآآآآخر دقيقه ..
وتقعد تعيدها على نفسك .. بكل مره
وكل مره تخاف يجيك يوم و .. تنسى ..!
ما قلت لكم ..؟!
أنا تخرجت .. :00193:
حابه اني اوقف معكم على كم محطه مريت فيها بالجامعة
يعني بـ سترجع ذكريات عـ السريع عندكم ..
واتمنى اني ما اثقل عليكم .. : )
( 0)
يمكن من أصعب القرارات اللي واجهتني بحياتي اني ادخل الجامعه
وادخل هـ القسم بالذات ..
ليه ؟!
ما له مستقبل واضح .. تقدرون تقولون ان الرؤية ضبابيه من خلاله .. : )
مين يدخل كلية العلوم .. و قسم نبات و أحياء دقيقة ؟!
والسؤال اللي كان ينطرح دايم .. طيب ليه ؟!!
من غير ليه .. عاجبني الاسم !
والله جد .. اول سبب خلاني اختار هـ القسم
ان اسمه عاجبني من يوم كنت بأول ثانوي ..
القلب وما يهوى ..وش اسوي ؟!.. : )
1423 هـ
تدرون متى كانت أكثر لحظات خوف مريت فيها ..
لما انقبلت أنا بالجامعة وصديقتي لأ ..
حسيت ان كل المخططات الحلوه اللي كنت راسمتها ببالي
عن حياتي الجامعيه بتتدمر ..
هي راحت لكلية التربية .. وانا بالجامعه
وقبلها بثالث ثانوي .. كنت انا بمدرسه وهي بمدرسه ثانيه
كان عندي استعداد اني اتحمل سنه وحده .. لكن أكثر من كذا ما اقدر ..
بخليها تجي عندي لو بالغصب << وهذا اللي صار فعلاً :biggrin:
أول اسبوعين داومتهم بدونها .. كنت احس اني ضايعه
لكن فيه شي كان مخليني متأكده انها بتجي عندي .. وقسم كنت متأكده
و فعلاً كلها اسبوعين .. ونورت الغاليه منى جامعة الملك سعود..
ولما بدت تمون .. صارت هي لحالها معلـَم خاص لقسم النبات ..
حتى انهم فكروا يحطون لها مكتب مستقل .. : )
" 101 كيم .. 101 ريض "
تدرون إن أول رسوب لي بالجامعه كان له طعم خطيييير
مدري ليه .. بس من جد حسيت اني كشخه وانا راسبه
حسيت اني بحلل الجامعه دراسه وتقطيع كتب ..
قد سمعت قبل ان الواحد ما يحس بطعم النجاح الا اذا حاول يوصل له كذا مره
وانا بصراحه حاولت كذا مرااااات .. عشان اعرف قيمة النجاح مضبوووط
أنا قد قلت لكم قبل إن عندي عقده من الكيمياء ؟!
اكره أي شي يمت لهـ الماده بصله ..
ما افهمها .. ماااا تخش مزاجي
عندي صعوبة تعلم متعلقه بأي شي يبدا بـحرف الكيم .. << هذي عشانك روري :0064:
مدري وش قصتها معي .. بس من جد ما خلتني اطلع منها بالساهل
اما الرياضيات .. نجحت فيه من اول مره ..
و بكل شطاره جبت فيه D .. :biggrin:
بس الحلوه منى ما طلعت منه الا بطلعة الروح
بعد الحمل لثلاث مرات متتالية .. انتصرت منو على الريض اخيييرا
لدرجة اننا سوينا حفله بهالمناسبة ..
جبنا لها كيكه كبيره .. لونها سماوي وابيض
ومكتوب عليها :
Yes
you did it ..!
من جد كان يوم عيد لما نجحت ..
وترى مافيه شي يخليها ترسب إلا الحظ النحس يـ حيااااااتي ..
" ماما آلاء .. :8581:"الجامعه تخليك تحتك بالناس وتتعود على الجلسه معهم ..
ومع الوقت فيه اشياء تربطك فيهم غير اوقات المحاضرات ..
نعيش أغلب يومنا مع بعض .. ويصير لنا هموم وحده .. و طريق واحد
وفيه ناس مع الوقت ما تقدر الا انك تعتمد عليهم ..
أول مره تعرفت على آلاء .. بمحاضرة 101 سلم ..
كانت محاضرة شبكه .. يعني دكتور يطل علينا من شاشة التلفزيون
و دكتورنا كان سوداني .. المحاضره فيها ملل و بروووود
يمتد على مدى ساعتين من 1 – 3 كل يوم أحد ..
محاضرة شبكة ودكتور مو مهتم .. ومشرفه منزله راسها على الطاوله ونايمه
يعني كل طالبه لها الحق بممارسة هوايتها المفضله ..
وانا كانت هوايتي اني اقعد بآخر صف بقاعة المدرجات الكبيره
وأشغل الرادو .. لأن الارسال يجي مضبوووط كل ما طلعت فوق
كنت اسمع الرادو.. اشخبط على مذكرتي .. و احاول قد ما اقدر
اني اضيع وقتي ..
و مره من المرات جت أغنيه لكاظم .. من زود الحماس معه
صرت أغني معه بصوت واطي ..
التفتت علي البنت اللي جنبي .. وقالت كاظم ؟!
قلت ايه .. قالت يوه احب هـ الاغنيه ..
قلت لها تبين تسمعين .. وعطيتها وحده من السماعات
خلصت الاغنيه وبدينا نسولف .. طبعاً أول الوقت كنا نسولف عن كاظم و أغنياته
اول اهتمام مشترك بيني أنا و آلاء كان .. كاظم ..: )
ومن بعدها صرت عاله عليها يا حياتي ..
يمكن تعرفت على آلاء بالسنه الثانيه من دخولي الجامعه
يعني من 4 سنوات .. ومن 4 سنوات وهي شاقيه فيني ..
ليش سميتها ماما آلاء ؟!
لأنها دايم تنقذني يـ حيااتي ..
دايم هي متواجده اذا نسيت محفظتي .. أو كانت المحفظه فاضيه
اقدر اعتمد عليها بشكل كبييييير ..
وحتى اعتمد و آخذ راحتي عـ الآخر ..
يعني ما استحي و اذب وجهي عندها وانا اضحك
ياعمري هي طيوبه .. ومع الوقت اكتشفت اني ما انعطى وجه
بس عقب ايييش .. بعد ما تدبست البنت .. و صار بينا عيش و ملح << طبعا هي اللي شاريته:biggrin:
على مدى 5 سنين و نص ..
من أحلى الأشياء اللي سويتها بالجامعه .. اني تعرفت على هـ البنت يا حبي لها.. :R10:
" الحمامه "
منى يا منى يا منى ..
وقسم بالله مافيه موقف يخليني اموووووت ضحك مثل ذاك الموقف
أنا آسفه .. بس من جد .. ما اقدر انسى تعابير وجهك ذاك اليوم
ابداااااااااع ..
خلوني اقولكم وش سالفة الحمامه مع منى ..
بيوم من الأيام الرايقه .. والجو كان ابداع وخطييير
ومنـو كانت كاشخه ذاك اليوم و مروقه عـ الاخر
و متجهه بكل روقان و وناسه لمحاضرة الحدق هي و آلاء ..
و أنا قاعده بمكان الشله ذيك الايام لأن كان عندي بريك
حاطه السماعات وقاعده اتصفح مجله وما عندي من الشيطان طريق..
المهم .. آخر خبري فيهم انهم متجهين للمحاضره بكل جد و اجتهاد
بعد كم دقيقه .. رجعت منى وهي تصيح
لا لا ما تصيح .. تشااااهق .. وحاطه يدها على راسها
أنا طار قلبي .. وش فيها البنيه ؟!
منى .. وش فيه ؟!
وهي تصيح و تأشر على راسها
جيت بحط يدي على راسها .. مادريت الا البنت تصرخ لا لا لا لا
منى وش فيه
انا استنتجت ان فيه شي خطير براسها
شي خطير لدرجة انها ما تبيني المسه ..
وشو يا منى ..
الحمامه الله يلعنه .. << طالعه من قلب
وش فيها الحمامه يا منى
..........................
...........................
تكلمي يابنت ؟!
الحمامه وصخت على رااااسي
وهنا كانت الصدمه .. :biggrin:
ودي اضحك بس البنت بين يديني تشاهق
يعني لازم احترم نفسي و اكتم الضحك شوي
ورحت معها للمغاسل .. وهي تصيييح ومعصصصبه
وتلعن أي كائن حي ينتمي للطيور بأي صفه ..
يمكن من زود الدعاوي اللي دعتها على ذا الطيور .. ربي بلاهم بانفلونزا هدت حيولهم
استغفر الله يا رب .. :biggrin:
المهم شرينا شامبو و غسلت شعرها ..
وراحت كملت طريقها للمحاضره عاااادي .. مع انه فات نص الوقت ..
لكنها صممت تروح للمحاضره عناد بالحمامه مو كله شطاره ..
من جد كانت تعابير وجهها ذاك اليوم اكشن ..
الى الحين كل ما جت ببالي امووووت ضحك ..
تكفيييين منو .. سويها لي ثاني مره :biggrin:
يا حبي لس يا شيخه .. من يوم يومس عسل:00129:
"أزمه و عدت .. "
يمكن اصعب فتره مرينا فيها خلال هالخمس سنين
هي آخر سنه .. مع انها كانت حلوه على المستوى الدراسي
يعني بدينا نسنع امورنا بالدراسه و عرفنا درب رفع المعدل لو بأقل قليل
لكن اغلب البنات اللي معنا تخرجوا ..
كنا نحس ان الجامعه فاضيه .. او مالنا انتماء يا عمري يا حنا ..
كون ان صديقاتنا يتخرجون قبلنا .. شي عادي
لكن مكانهم يكون فاضي لـ هالدرجه .. مو سهله والله
حسيت ان جو الجامعه قلب جو دراسه بحت
اجي عشان احضر .. ما افوت محاضرات الا اذا فيه شي يستاهل
احضر على الموعد .. واطلع على الموعد
تقدرون تقولون ما صرنا نهتم بالجمعات والبنات .. مدري شلون .. كأننا ضعنا شوي
بس الفتره الأخيره كانت حلوه ..
يعني امداها الجامعه انها تودعنا على خير
عرفنا كم بنوته حلوه .. وشله يوسعون الخاطر
الله يعافيها منى .. أو الله يعافي لاب فسيولجي البكتيريا اللي عرفها عليهم
أحلى بنات والله .... : )
" وش بعد .. "
آخر يوم بالجامعه كان غريب ..
آخر امتحان لي ما حليت زين لكن كنت مبسوطه و بس ابتسم ..
لما سلمت ورقة آخر امتحان لي .. سألتني الاستاذه .. وش سويتي ؟!
قلت لها وانا اضحك .." تخرجت..! "
كان شعور غريب .. حسيت اني بآخر نقطه حطيتها على الورقه
انهيت مرحلتي الجامعيه كلها .. بنقطه وانتهى كل شي ..
تعبنا يمكن .. لكن هالمرحله عطتني اشياء حلوه بحياتي ما تتعوض
دخلتها و عمري 18 وطلعت منها وانا على وشك 23
تغيرت تماما .. كل شي فيني تأسس من جديد وتغير مع كل يوم
قضيته بين القاعات والمعامل و اوراق الامتحان و جمعات البنات
وبين كل فتره وفتره .. احس اني اكبر وفيني اشياء كثييير تكبر معي .. : )
حبيت هـ المرحله .. حبيتها لدرجة اني ما ابي اطلع منها .. : )
28 / 1/ 1429يوم حفل التخرج ..
وش اقولكم عن ذاك اليوم .. كان حلو
الكل كان فرحان فينا .. وين ما رحت الناس يهنون ويباركون
كل البنات لا بسين ارواب التخرج واشكالهم روعه ..
نسولف ونضحك و متحمسن وكل شي كل شي بوقت واحد ..!
و اكثر شي حسيت ان الدنيا ما تشيلني من الفرحه لما دخلنا المسرح
اول ما وقفت مع كل بنات الدفعه .. كنت اشوف آخر صف بالقاعه
كانوا كل الناس اللي احبهم حاضرين .. مبسوطين معي بذاك اليوم
وقفت وانا عيوني عليهم .. كانت الفرحه ما تكفيني
اني اتخرج انا وصديقتي .. هذي فرحه
لكن القى كل الناس اللي احبهم معي ذاك اليوم وجايين عشاني و فرحتهم واصله لحد عندي..
هذا شي اكثر من اني استاهله ..!
لما بدت المسيره وسمعت اسمي قمت استلم الشهاده
كنت احس اني شايله معي ناس كثيرين .. و كنت استلم الشهاده عنهم كلهم
طول الطريق من مكاني لـ مصافح يد العميده ..
كنت اسمع تشجيع و تصفيق و كنت احس بفرحه بحياتي ما راح احس مثلها
والله العظيم .. محد فرح بيوم التخرج كثري
لأن محد عنده زي اهلي ..!
الله لا يحرمني منهم ياااااارب ..
يمكن يوم التخرج بحد ذاته فرحه ما تتعوض ..
لكن فرحتي بذاك اليوم تعدت أشياء كثييييره .. حتى ما اقدر اعبر عنها .. : )يمكن طولت عليكم بسوالفي شوي ..
بس حبيت انكم تشاركوني توديع هـ المرحله ..
لي سنتين و أنا بين جدران هـ المنتدى .. شاركتوني بلحظات حلوه كثير
و حلاتها والله انها كانت معكم ..
يكفينا انا ومنى منكم هـ الفرحه اللي عشتوها معنا الكم يوم اللي فاتوا ..
كنتم اهل .. وطول عمركم اخوان لنا ..
مشكورين الى مالانهايه : )اتمنى اني كنت خفيفه على قلوبكم .. :rose: